ಅಲಯನ್ಸ್ ಕ್ಲಬ್ ಇಂಟರ್ ನ್ಯಾಷನಲ್ ಡಿಸ್ಟ್ರಿಕ್ಟ್ 272(S) ಜಿಲ್ಲಾಸಂಪುಟ ಪದಗ್ರಹಣ ಕಾರ್ಯಕ್ರಮ ಬೆಂಗಳೂರಿನಲ್ಲಿ ವಿಜೃಂಭಣೆಯಿಂದ ನೆರವೇರಿತು

ಬೆಂಗಳೂರು, ಏಪ್ರಿಲ್ 12, 2025:
ಅಸೋಸಿಯೇಷನ್ ಆಫ್ ಅಲಯನ್ಸ್ ಕ್ಲಬ್ ಇಂಟರ್ ನ್ಯಾಷನಲ್ ಡಿಸ್ಟ್ರಿಕ್ಟ್ 272(S) ವತಿಯಿಂದ ಜಿಲ್ಲಾಸಂಪುಟ ಸದಸ್ಯರ ಪದಗ್ರಹಣ ಸಮಾರಂಭವನ್ನು ಏಪ್ರಿಲ್ 12 ರಂದು ಬೆಳಿಗ್ಗೆ 10 ಗಂಟೆಗೆ ಬೆಂಗಳೂರು ಗಾಂಧಿನಗರದ ಎಫ್‌ಕೆಸಿಸಿಐ (FKCCI) ಸಭಾಂಗಣದಲ್ಲಿ ವಿಜೃಂಭಣೆಯಿಂದ ಆಯೋಜಿಸಲಾಯಿತು.

ಅಲಯನ್ಸ್ ಕ್ಲಬ್ ಇಂಟರ್ ನ್ಯಾಷನಲ್ ಎಂಬುದು ಭಾರತದ ಸ್ವದೇಶಿ ಸೇವಾ ಸಂಸ್ಥೆಯಾಗಿದ್ದು, ಕಳೆದ 18 ವರ್ಷಗಳಿಂದ ದೇಶದಾದ್ಯಂತ ನಿಷ್ಠೆಯುತ ಹಾಗೂ ಪರಿಣಾಮಕಾರಿಯಾದ ಸಮಾಜಮುಖಿ ಚಟುವಟಿಕೆಗಳನ್ನು ನಡೆಸುತ್ತಿದ್ದು, ಇದರ ಪ್ರಧಾನ ಕಚೇರಿ ನವದೆಹಲಿಯ ನೋಯ್ಡಾದಲ್ಲಿ ಇದೆ.

ಈ ವರ್ಷ ಅಂತರಾಷ್ಟ್ರೀಯ ಅಧ್ಯಕ್ಷರಾಗಿ ಅಲಯ್ ರಾಜಕುಮಾರ್ ಸಸ್ಸೇನಾ, ದಕ್ಷಿಣ ಪ್ರಾಂತ್ಯದ ಅಂತರಾಷ್ಟ್ರೀಯ ನಿರ್ದೇಶಕರಾಗಿ ಅಲಯ್ ನಾಗರಾಜ್ ವಿ. ಬೈರಿ, ಪಿಐಡಿ ಅಲಯ್ ಜಿ.ಪಿ. ದಿವಾಕರ್, ಐಸಿಸಿ ಅಲಯ್ ಅಜಂತ ಎಸ್. ರಂಗಸ್ವಾಮಿ, ಅಲಯ್ ಎಂ. ಮುನಿಯಪ್ಪ ಹಾಗೂ ಮಾಜಿ ಶಾಸಕ ಹಾಗೂ ಚಲನಚಿತ್ರ ನಟ ನ.ಲ. ನರೇಂದ್ರಬಾಬು ಅವರು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.

ಈ ವರ್ಷದ ಏಪ್ರಿಲ್ 1 ರಿಂದ ಅಧಿಕಾರ ವಹಿಸಿಕೊಂಡಿರುವ ಜಿಲ್ಲಾ ಗವರ್ನರ್ ಅಲಯ್ ಡಾ. ಸತ್ಯವತಿ ಬಸವರಾಜ್ ಅವರ ನೇತೃತ್ವದಲ್ಲಿ ನೂತನ ಸಂಪುಟ ಸದಸ್ಯರು ಅಧಿಕಾರ ಸ್ವೀಕರಿಸಿದರು.

ಕಾರ್ಯಕ್ರಮದಲ್ಲಿ ಮಾತನಾಡಿದ ಜಿಲ್ಲಾ ಪಿಆರ್‌ಒ ಅಲಯ್ ಶೋಭಾ ವಿಶು ಅವರು, “ಅಲಯನ್ಸ್ ಸಂಸ್ಥೆ ದೇಶ, ರಾಜ್ಯ ಮತ್ತು ಜಿಲ್ಲೆ ಮಟ್ಟದಲ್ಲಿ ಶಿಕ್ಷಣ, ಆಹಾರ ಸೇವೆ, ವೃದ್ಧಾಶ್ರಮ, ಅನಾಥಾಶ್ರಮ, ಆರೋಗ್ಯ ಶಿಬಿರಗಳು, ಸ್ವಚ್ಛತಾ ಅಭಿಯಾನಗಳು, ಸಸಿ ನೆಡುವಿಕೆ ಮುಂತಾದ ನಾನಾ ಸೇವಾ ಚಟುವಟಿಕೆಗಳನ್ನು ಯಶಸ್ವಿಯಾಗಿ ನಡೆಸುತ್ತಿದೆ” ಎಂದು ಹೇಳಿದರು.

ಅವರು ಮುಂದುವರೆದು, “ಅಲಯನ್ಸ್ ಸಂಸ್ಥೆ ಪ್ರಪಂಚದಾದ್ಯಂತ 28 ದೇಶಗಳಲ್ಲಿ ತನ್ನ ಸೇವಾ ಜಾಲವಿಸ್ತಾರ ಹೊಂದಿದ್ದು, 2,500ಕ್ಕೂ ಹೆಚ್ಚು ಕ್ಲಬ್‌ಗಳು ಹಾಗೂ 30,000ಕ್ಕೂ ಅಧಿಕ ಸದಸ್ಯರನ್ನು ಹೊಂದಿದೆ. ಬೆಂಗಳೂರಿನ ಜಿಲ್ಲೆ ಕೇವಲ ಕಳೆದ ವರ್ಷ ಆರಂಭವಾದರೂ ಈಗಾಗಲೇ 35 ಕ್ಲಬ್‌ಗಳು ಹಾಗೂ 1000ಕ್ಕೂ ಹೆಚ್ಚು ಸದಸ್ಯರನ್ನು ಹೊಂದಿದೆ ಮತ್ತು ಹಲವು ಅಂತಾರಾಷ್ಟ್ರೀಯ ಗೌರವಗಳನ್ನು ಗಳಿಸಿದೆ,” ಎಂದರು.

City Today News 9341997936