ಭಾರತೀಯ ಫುಟ್ಬಾಲ್ ಅಭಿವೃದ್ಧಿಗೆ ಬೆಂಗಳೂರು ಎಫ್‌ಸಿಯಿಂದ ಹೊಸ ಹೆಜ್ಜೆ – ಅತ್ಯಾಧುನಿಕ ತರಬೇತಿ ಕೇಂದ್ರ ಉದ್ಘಾಟನೆ

ಬೆಂಗಳೂರು, ಸೆಪ್ಟೆಂಬರ್ 12:
ಭಾರತದಲ್ಲಿ ವಿಶ್ವಮಟ್ಟದ ಫುಟ್ಬಾಲ್ ಮೂಲಸೌಕರ್ಯ ವಿಸ್ತರಣೆಯ ಪ್ರಯತ್ನದ ಭಾಗವಾಗಿ, ಬೆಂಗಳೂರು ಎಫ್‌ಸಿ ಇಂದು ಬೆಂಗಳೂರಿನ ಸೆಂಟರ್ ಆಫ್ ಸ್ಪೋರ್ಟ್ಸ್ ಎಕ್ಸಲೆನ್ಸ್ (CSE) ನಲ್ಲಿ ತನ್ನ ಅತ್ಯಾಧುನಿಕ ತರಬೇತಿ ಕೇಂದ್ರವನ್ನು ಉದ್ಘಾಟಿಸಿತು.

ಈ ಕೇಂದ್ರದಲ್ಲಿ ಹೈಬ್ರಿಡ್ ಪಿಚ್‌ ಸೇರಿದಂತೆ ನೈಸರ್ಗಿಕ ಹುಲ್ಲಿನ 9-ಎ-ಸೈಡ್ ಪಿಚ್, ಸಂಪೂರ್ಣ ಸಜ್ಜಿತ ಜಿಮ್ನೇಶಿಯಂ, ಪಂದ್ಯಮಟ್ಟದ ಡ್ರೆಸ್ಸಿಂಗ್ ರೂಮ್‌ಗಳು, ಐಸ್-ಬಾತ್ ಹಾಗೂ ರಿಕವರಿ ಸೌಲಭ್ಯಗಳಿವೆ. ಹೈಬ್ರಿಡ್ ಪಿಚ್ ಎಂದರೆ ಪ್ರಾಕೃತಿಕ ಹುಲ್ಲಿನೊಂದಿಗೆ ಸಿಂಥೆಟಿಕ್ ಅಳವಡಿಕೆಯನ್ನು ಹೊಂದಿರುವ ಮೈದಾನವಾಗಿದ್ದು, ವರ್ಷಪೂರ್ತಿ ಸಮಾನ ಸ್ಥಿರತೆ ಮತ್ತು ದೀರ್ಘಾಯುಷ್ಯ ನೀಡುತ್ತದೆ.

ಈ ಸಂದರ್ಭದಲ್ಲಿ ಮಾತನಾಡಿದ ಬೆಂಗಳೂರು ಎಫ್‌ಸಿ ಮಾಲೀಕ ಪಾರ್ಥ್ ಜಿಂದಾಲ್ ಅವರು, “ಭಾರತೀಯ ಫುಟ್ಬಾಲ್ ಎದುರಿಸುತ್ತಿರುವ ಸವಾಲುಗಳ ನಡುವೆಯೂ ನಮ್ಮ ಅಭಿವೃದ್ಧಿ ಪ್ರಯತ್ನಗಳು ನಿರಂತರ. ಇದೇ ಸೌಲಭ್ಯದಲ್ಲಿ ರಾಷ್ಟ್ರೀಯ ತಂಡವು ತರಬೇತಿ ನಡೆಸಿ ಯಶಸ್ವಿ CAFA ನೇಶನ್ಸ್ ಕಪ್‌ಗೆ ತಯಾರಿ ಮಾಡಿಕೊಂಡಿತ್ತು. ಭವಿಷ್ಯದಲ್ಲಿ ಇದು ಭಾರತ ತಂಡದ ಪ್ರಮುಖ ತರಬೇತಿ ಕೇಂದ್ರವಾಗಲಿದೆ ಎಂಬ ವಿಶ್ವಾಸವಿದೆ. ಈಗಾಗಲೇ ನಮ್ಮ ತಂಡದ ಆರು ಆಟಗಾರರು ಭಾರತೀಯ ತಂಡದಲ್ಲಿ, ಏಳು ಆಟಗಾರರು U-23 ತಂಡದಲ್ಲಿ ಸ್ಥಾನ ಪಡೆದಿದ್ದಾರೆ,” ಎಂದು ಹೇಳಿದರು.

ತರಬೇತಿ ಕೇಂದ್ರದಲ್ಲಿ ತಂಡದ ಆಟಗಾರರು ಮತ್ತು ಸಿಬ್ಬಂದಿಗೆ ಪೌಷ್ಟಿಕ ಆಹಾರ ಒದಗಿಸಲು ಪಾಕಶಾಲೆ ಮತ್ತು ಪ್ಯಾಂಟ್ರಿ ಸೌಲಭ್ಯವನ್ನು ಕೂಡ ಹೊಂದಿಸಲಾಗಿದೆ. ಜೊತೆಗೆ ಟ್ಯಾಕ್ಟಿಕಲ್ ಚರ್ಚೆ, ವೀಡಿಯೋ ವಿಶ್ಲೇಷಣೆ ಹಾಗೂ ತಂಡದ ಪ್ರಸ್ತುತಿಗಳಿಗಾಗಿ ವಿಶೇಷ ಸಭಾಂಗಣ ವ್ಯವಸ್ಥೆಯೂ ಮಾಡಲಾಗಿದೆ.

CSE ಸಂಸ್ಥಾಪಕ ವಿವೇಕ್ ಕುಮಾರ್ ಅವರು, “ಭಾರತೀಯ ಫುಟ್ಬಾಲ್ ಅಭಿವೃದ್ಧಿಗೆ ಹೆಜ್ಜೆ ಹಾಕುತ್ತಿರುವ ಬೆಂಗಳೂರು ಎಫ್‌ಸಿ ಕ್ಲಬ್‌ಗೆ ವಿಶ್ವಮಟ್ಟದ ಸೌಲಭ್ಯ ಒದಗಿಸುವುದು ನಮ್ಮ ಹೆಮ್ಮೆ. ಈ ಸಹಯೋಗದಿಂದ ದೇಶದ ಫುಟ್ಬಾಲ್ ಭವಿಷ್ಯಕ್ಕೆ ನೂತನ ಪ್ರೇರಣೆ ದೊರೆಯಲಿದೆ,” ಎಂದು ಅಭಿಪ್ರಾಯಪಟ್ಟರು.

City Today News 9341997936